scjaraciule maraciule: un blog furlan pai fruts!: aprile 2020

La Mestre Grazia nus conte la storie di un Piçiul Princip che al vîf su di une piciule stele...

Voleso cognossilu ancje vualtris?

introduzione

capitolo 1 - prima parte

capitolo 1 - seconda parte

“I GRANCJ NO CAPISSIN MAI NUJE DI BESSÔI E I FRUTS SI STRACHIN A SPIEGÂUR DUT OGNI VOLTE.”

Isal mai capitât ancje a ti di no jessi capît?

Di ve spiegât plui voltis a un grant ce che tu vevis fât o mostrât un to lavôr e di no jessi stât capît?

Atu voe di disegnâ il Piçiul Princip?

O il serpint boa cun dentri un elefant: ancje il to al somee ad un cjapiel?

Se tu vuelis lei di bessol il librut tu puedis cjatalu chi:
https://www.amazon.it/Pi%C3%A7ul-Princip-Testo-friulano/dp/8866433551

Di verdure ogni mignestre e je buine par fâ fieste (Storiute di M. Pupini)

Cheste e je la storie dal ort di Toni e di Catine e des verduris che a finiran intal mignestron.

Dut al scomence di buinore cuant che il soreli al cuche daûr de mont.
Vuê, Toni e Catine a vuelin cjapâ sù verdure par puartâle a marcjât.

Plens di buine volontât, a rivin intal ort cul mus e il so cjaruçut. Catine e cjamine dute contente cul zei in man e Toni, plen di morbin,al ven indevant saltuçant biel che si cjale ator...

Il mus al sa ben che i tocjarà une zornade plene di fadie e, tirant il cjaruç cuintrivoie, al fâs il zîr dal ort par jessi pront a cjariâ lis buinis verduris di puartâ in place des feminis. Toni, che lu cognòs ben, i va dongje par fâi coraç e, scherçant, si met a cjantâi... chê dal mus.

Il mussut, cence rabiâsi par chê cjantade, i da une russadute cul so music e ju mene intal mieç dai strops, indulà che ur spiete une brute sorprese: lis verduris a son sparidis!
Catine si met lis mans intai cjavei e Toni, stranît, al spalanche i voi e al mene i braçs corint sù e jù pal ort

come un mat.
Il mus al pense “Cence verduris di puartâ al marcjât finalmentri vuê no lavori!” e, dut content, si sente a polsâ.
Toni si grate il cjâf, po al met di gnûf il cjapiel e i dîs ae femine: “A son stâts i cais!” E chê altre: “No, no, a son stadis lis ruiis! Dome lôr a puedin mangjâ cussì tantis verduris intune gnot!”

Toni e Catine, avilîts, a àn di scomençâ di gnûf a fâ l’ort e, cjapât il mus pe cjavece, a van a cjoli i imprescj.
Za une volte ur veve capitât di intopâsi cuntune ruie, ma chê no

voleve savênt di mangjâ, fin che a fuarce di vitis e jere deventade une pavee...
Ruie o no ruie, cumò si trate di no pierdi timp e, cjapade la svangje, Toni al sisteme la tiere biel che Catine i va daûr semenant ogni ben di diu...
“Cumò sì che o podìn stâ contents!” i dîs Toni ae femine, freantsi lis mans pal biel lavôr fat. Catine e je dacuardi e, cjapât l’om sot il braç, a van vie a fâ di gustâ.
Biel che chei doi a son in cjase, ve che tal ort al rive il Re des furmiutis a viodi se al è alc di cjapâ sù.

Al cjamine seneôs cucant di ca e di là.
“Cjo no mo che Toni e Catine a àn semenât di gnûf – al dîs – Cjale ca cetantis bielis semençutis di cjapâ sù!“ al zonte, biel che cuntune man ur fâs segn aes furmiutis di vignî a judâlu a fâ botin.

Ognidune e puarte vie une semence, lassant il strop vueit.
Ma, come se nol bastàs, ve che a rivin ancje i farcs... O chei birbants a ribaltin dut l’ort par cirî lidrîs e pocs di lidric di roseâ. In chel Catine e ven fûr di cjase cul so biel zeut sot il braç. Chei li, cuant che le viodin, a van a scuindisi.

Catine e cjamine sù e jù pal ort, sbassantsi ogni tant par viodi se la semence e à menât... Puare Catine, tant lavôr par dibant. L’ort al è un disastri: tra furmiis e farcs nol è cressût nuie e, avilide, si sente a pensâ ce fâ.

Intant i farcs, cucant des farcadicis, la cjançonin cjantant chê de femine di Todaro.
Catine no si piert vie e e clame Toni, che al rive cui imprescj su la cariole a dâi une man.
«Ce fature par un plat di mignestron!» al pense Toni, ma ben vulintîr al tache a svangjâ prin che al tachi a plovi.

E svangje, svangje, ancje par cheste volte e je fate.
«Cumò al pues plovi tant che al vûl» e pense Catine, biel che, sveltuts, a jentrin in cjase metint a sotet imprescj e cariole. La ploie e à bagnât l’ort e, a plancut, a cressin bielis carotis dolçutis e coloradis. La tiere e je gjenerose e, a planc a planc, l’ort si jemple di verduris di ogni sorte...
L’ort al è une maravee e lis verduris a cjantin di gjonde par vie che a son contentis di judâ Catine e Toni a fâ il mignestron.
Ma chel biel cjantâ al à clamât dongje un trop di cuninuts che a rivin saltuçant... Contents di vê cjatât un ort plen di buinis robis di mangjâ, a van nasicant ogni verdure, e po le cjapin par man e a zuin insiemit in cercli.

Dopo vê zuiât come fruts, si puartin vie dutis lis verduris: vuê il mignestron lu fasaran i cuninuts!

Catine e Toni a tornin subit dopo intal ort e cun sorprese a scuvierzin che cualchidun al à fat di gnûf botin cu lis lôr verduris.
«Cussì propit nol va ben» e dîs Catine spalancant i braçs, biel che Toni si grate il cjâf sperant di cjatâ une soluzion a chel davoi.

Dopo di vê pensât un pôc parsore, Toni al vûl meti une schirie di spaventepassaris a vuardie dai strops. Catine e je dacuardi e a van intal toblât a cjoli ce che al covente par fâ sù cuatri omenuts di paie.
Toni al è sodisfat di chê idee e al spere che i omenuts di paie a fasin buine vuardie al so ort.

Cumò Catine e l’om a puedin lâ a polsâ.
I spaventepassaris a son pronts a lavorâ e, cui braçs spalancâts, a viodin a cressi a planc a planc lis gnovis verduris. Tal mieç di chê bielece, a un ciert pont a rivin ancje lis mariutinis che, lizerutis, a svoletin in mieç dal ort a dâi une man ae nature buine e gjenerose.

Finalmentri l’ort al à cjapât fuarce, ogni verdure e je pronte par jessi cjapade sù e Toni e Catine a tornin cul mus in mieç dai strops.
Il mus al tire il so cjaruçut, domandantsi se chês verduris ur plasin a ducj.
Pronte, Catine i da une gratadute sul music e po, par sclarîi lis ideis, i cjante scherçose chê de vecjute. Catine e sa ben che lis sôs verduris a son lis miôr che si pues vê par fâ un bon mignestron!
Il mussut nol pues fâ nuie altri che judâ i doi contadins a cjapâlis sù.

A planc a planc, a metin adun dutis lis verduris: riis di carotis, civole, verzis, cocinuts, melanzanis, cesarons, patatis, lidric e salate...
«Colôrs, profums e bon savôr, ve la ricete speciâl de mignestre di Catine! Il mignestron nol è altri che la este grande des verduris inte pignate, pe gjonde di ducj!» al dîs Toni cjarinant il so mussut.
Cumò la fadie e je ben paiade e intal ort nol mancje plui nuje e nissun!
Bon apetit a ducj!

(storiute de mestre Miriam Pupini de scuele di Rualis, publicade pal progjet "Marilenghe te Scuele 2014, disens de mestre Michela Gosparini de scuele "Pellico" di Udin)

scjaraciule maraciule: un blog furlan pai fruts!

mercoledì 29 aprile 2020

Il Piçiul Princip (Cjapitul 2)

mercoledì 22 aprile 2020

Il Piçiul Princip (Cjapitul 1)

martedì 21 aprile 2020

Zornade da Tiere

mercoledì 15 aprile 2020

Une storie di verduris!!!

sabato 11 aprile 2020

LA SURISUTE

giovedì 9 aprile 2020

Il Piçiul Princip (Cjapitul 14)

Segnala una violazione