Une storie di verduris!!!

Di verdure ogni mignestre e je buine par fâ fieste (Storiute di M. Pupini)

Cheste e je la storie dal ort di Toni e di Catine e des verduris che a finiran intal mignestron.

Dut al scomence di buinore cuant che il soreli al cuche daûr de mont.
Vuê, Toni e Catine a vuelin cjapâ sù verdure par puartâle a marcjât.

Plens di buine volontât, a rivin intal ort cul mus e il so cjaruçut. Catine e cjamine dute contente cul zei in man e Toni, plen di morbin,al ven indevant saltuçant biel che si cjale ator...

Il mus al sa ben che i tocjarà une zornade plene di fadie e, tirant il cjaruç cuintrivoie, al fâs il zîr dal ort par jessi pront a cjariâ lis buinis verduris di puartâ in place des feminis. Toni, che lu cognòs ben, i va dongje par fâi coraç e, scherçant, si met a cjantâi... chê dal mus.

Il mussut, cence rabiâsi par chê cjantade, i da une russadute cul so music e ju mene intal mieç dai strops, indulà che ur spiete une brute sorprese: lis verduris a son sparidis!
Catine si met lis mans intai cjavei e Toni, stranît, al spalanche i voi e al mene i braçs corint sù e jù pal ort

come un mat.
Il mus al pense “Cence verduris di puartâ al marcjât finalmentri vuê no lavori!” e, dut content, si sente a polsâ. 
Toni si grate il cjâf, po al met di gnûf il cjapiel e i dîs ae femine: “A son stâts i cais!” E chê altre: “No, no, a son stadis lis ruiis! Dome lôr a puedin mangjâ cussì tantis verduris intune gnot!”

Toni e Catine, avilîts, a àn di scomençâ di gnûf a fâ l’ort e, cjapât il mus pe cjavece, a van a cjoli i imprescj.
Za une volte ur veve capitât di intopâsi cuntune ruie, ma chê no

voleve savênt di mangjâ, fin che a fuarce di vitis e jere deventade une pavee...
Ruie o no ruie, cumò si trate di no pierdi timp e, cjapade la svangje, Toni al sisteme la tiere biel che Catine i va daûr semenant ogni ben di diu...
“Cumò sì che o podìn stâ contents!” i dîs Toni ae femine, freantsi lis mans pal biel lavôr fat. Catine e je dacuardi e, cjapât l’om sot il braç, a van vie a fâ di gustâ.
Biel che chei doi a son in cjase, ve che tal ort al rive il Re des furmiutis a viodi se al è alc di cjapâ sù. 

Al cjamine seneôs cucant di ca e di là. 
“Cjo no mo che Toni e Catine a àn semenât di gnûf – al dîs – Cjale ca cetantis bielis semençutis di cjapâ sù!“ al zonte, biel che cuntune man ur fâs segn aes furmiutis di vignî a judâlu a fâ botin.

Ognidune e puarte vie une semence, lassant il strop vueit.
Ma, come se nol bastàs, ve che a rivin ancje i farcs... O chei birbants a ribaltin dut l’ort par cirî lidrîs e pocs di lidric di roseâ. In chel Catine e ven fûr di cjase cul so biel zeut sot il braç. Chei li, cuant che le viodin, a van a scuindisi. 

Catine e cjamine sù e jù pal ort, sbassantsi ogni tant par viodi se la semence e à menât... Puare Catine, tant lavôr par dibant. L’ort al è un disastri: tra furmiis e farcs nol è cressût nuie e, avilide, si sente a pensâ ce fâ.

Intant i farcs, cucant des farcadicis, la cjançonin cjantant chê de femine di Todaro.
Catine no si piert vie e e clame Toni, che al rive cui imprescj su la cariole a dâi une man.
«Ce fature par un plat di mignestron!» al pense Toni, ma ben vulintîr al tache a svangjâ prin che al tachi a plovi.

E svangje, svangje, ancje par cheste volte e je fate.
«Cumò al pues plovi tant che al vûl» e pense Catine, biel che, sveltuts, a jentrin in cjase metint a sotet imprescj e cariole. La ploie e à bagnât l’ort e, a plancut, a cressin bielis carotis dolçutis e coloradis. La tiere e je gjenerose e, a planc a planc, l’ort si jemple di verduris di ogni sorte...
L’ort al è une maravee e lis verduris a cjantin di gjonde par vie che a son contentis di judâ Catine e Toni a fâ il mignestron.
Ma chel biel cjantâ al à clamât dongje un trop di cuninuts che a rivin saltuçant... Contents di vê cjatât un ort plen di buinis robis di mangjâ, a van nasicant ogni verdure, e po le cjapin par man e a zuin insiemit in cercli.

Dopo vê zuiât come fruts, si puartin vie dutis lis verduris: vuê il mignestron lu fasaran i cuninuts!

Catine e Toni a tornin subit dopo intal ort e cun sorprese a scuvierzin che cualchidun al à fat di gnûf botin cu lis lôr verduris.
«Cussì propit nol va ben» e dîs Catine spalancant i braçs, biel che Toni si grate il cjâf sperant di cjatâ une soluzion a chel davoi.

Dopo di vê pensât un pôc parsore, Toni al vûl meti une schirie di spaventepassaris a vuardie dai strops. Catine e je dacuardi e a van intal toblât a cjoli ce che al covente par fâ sù cuatri omenuts di paie.
Toni al è sodisfat di chê idee e al spere che i omenuts di paie a fasin buine vuardie al so ort.

Cumò Catine e l’om a puedin lâ a polsâ.
I spaventepassaris a son pronts a lavorâ e, cui braçs spalancâts, a viodin a cressi a planc a planc lis gnovis verduris. Tal mieç di chê bielece, a un ciert pont a rivin ancje lis mariutinis che, lizerutis, a svoletin in mieç dal ort a dâi une man ae nature buine e gjenerose.

Finalmentri l’ort al à cjapât fuarce, ogni verdure e je pronte par jessi cjapade sù e Toni e Catine a tornin cul mus in mieç dai strops.
Il mus al tire il so cjaruçut, domandantsi se chês verduris ur plasin a ducj.
Pronte, Catine i da une gratadute sul music e po, par sclarîi lis ideis, i cjante scherçose chê de vecjute. Catine e sa ben che lis sôs verduris a son lis miôr che si pues vê par fâ un bon mignestron! 
Il mussut nol pues fâ nuie altri che judâ i doi contadins a cjapâlis sù.

A planc a planc, a metin adun dutis lis verduris: riis di carotis, civole, verzis, cocinuts, melanzanis, cesarons, patatis, lidric e salate...
«Colôrs, profums e bon savôr, ve la ricete speciâl de mignestre di Catine! Il mignestron nol è altri che la este grande des verduris inte pignate, pe gjonde di ducj!» al dîs Toni cjarinant il so mussut. 
Cumò la fadie e je ben paiade e intal ort nol mancje plui nuje e nissun!
Bon apetit a ducj!

(storiute de mestre Miriam Pupini de scuele di Rualis, publicade pal progjet "Marilenghe te Scuele 2014, disens de mestre Michela Gosparini de scuele "Pellico" di Udin)